Iang Hleikhun Sunghno Ka NU

Ka sem hlan in ka zawn na ruah

Ka pawi ka fa caah tiin

A tlum a al, na ei ngam lo

Zawtfah na tuar, zonzaai na in

Ka laihri tlaitu maw ka Nu

Na hnukti tlum ka nunnak hram

Chim thli tho in zo thli hrang seh

Merem ka um na tanghlum chung

Zawtfah ka tuar, ka ai hraam ah

“Maw Cung Khuazing, kei zaw deuh ning

Ka fahniang tu dam ter hram” tiah

Mittli luangin Cung Zing na nawl

Kehlei na baan ka tlinh zawn ah

Orhlei kut in na ka kup rih!

Merem lo in zing khua na dei

Ka hnawm thil hmanh fih hin loin

Retheih tuar in na ka zohkhenh.

Ka sualpalhnak tam ial hmanh seh

Na ka ngaihthiam kho peng ka Nu

Ka sining cang bantuk te in

Aka cohlang khotu ka Nu

Na ka cawnpiak a nungmi Bia

Lam le Biatak, Nunnak Cerhti

Pathian Vel le Khamhnak Thawngttha

Van nun ro ttha na ka co ter

Semhawi rualza tluk seh tiin

Nuncan ziaza tha na ka chimh

Na ka dawtnak hngal thiam loin

Lam ka pial sual lio caan hmanh ah

Thinlung kuai mitthli tlak buin

Cung Zing na nawl na fa kei caah.

Ka fa dawt nih semrual tluk seh

Fimnak lungvar ngei seh tiin

Thlanti put le zaangba ngaiin

Chukcho na kal, rianghrang na ttuan

Na ka vuih maw fimnak rosung!

Tipi ral khat thlahra dang ah

Zaan khuamawt lio thlikik lakah

Tlingkhan cungin zuun in ka zaw,

Kaan hlam riangmang, na ankaa neem

Panh siarmar te na mithmai dawh

Khua nih an dei ni nih an liam

Fur nih aa lim, khuasik caan le

Thaal nih an liam, khua caan aa thleng

Na dawtnak sung aa thleng ballo

A dong ballo, a hmun zungzal.

Dawtnak sung khun cerhti put bang

Pathian dawtnak a chang khomi

Dawtnak sungkhun ngeitu ka Nu

Nang dawtnak bang ngeih ve ka duh

Na iang hlei khun sunghno ka Nu

Panh siarmar te na nih hmai ah

Ka hmuh Cung Zing mithmai dawh kha

Khuaiti zuu bang na aan a thlum

Vanmi hla dawh an hlei kho tuk!

Thinlung takin kan nawl ka Nu

Ka sualpalhnak ka ngaithiam hram

Pathian,le nangmah le ka Pa

duhnak lamkha zulh kaa zuam lai.

Ka dawt nunnem Iangngei ka Nu

Ka thinlung ngeitu nang na si

Ka laihri tlaitu “nunnak hram”

Cung Khuazing Bawi tidah locun

Ka Pa ka dawt bik ko ka Nu

Ka Pa nakin nang ka'n dawt deuh

“Kaa lawm, ka Nu, kan dawt tuk ee”

Nun khuasau in na ngandam seh

Lung hnangam in na tha dam seh

Na te na fa lungfim hna seh

Na dawt ka Pa lawm zungzal seh

Rel awk thluachuah tam chin hram seh!

Sunghno ka Nu, Khua dei deng cang

Zaihla tin remh cu deng cang lai.