Ka Nu Nih Aka Cawkpiak Hmasat Bikmi Cauk

Nifatin ka reel lengmang mi cauk pakhat a um. Cu cauk cu ka Nu nih a ka cawk piak hmasat bikmi cauk a si. Hi cauk chungah siangpahrang nih an tial mi bia a um bantuk in, lothlopa nih a tial mi bia zong aa tel. Ruahnak sang ngeimi pa nih a tial mi bia tampi aa tel bantuk in, ngatlaipa nih a tial mi tete zong aa tel. Hi cauk cu ka rel chinchin, i ka uar deuhdeuh. Nidang ah ka rak rel bal cangmi cacaang tampi hna zong a thar in ka hmuh than tikpauhah thazaang thar tampi ka ngah than tawn. Hi cauk chung bia hna nih keimah nunnak lawng si lo in, midang nunnak tampi zong arak thlen.

Sianginn ah ka hman mi text books le Shwe Tway dah tilocun, ka Nu nih 4.7.1993 ni ah cauk a ka cawk piak hmasa bik. Mah cauk cu a maan Ks. 120 arak si. Taangthum ka kai kum a si caah Laica ka reel thiam kate a si fawn i cu cauk cu ka rak reel lengmang. Ka lung nih a phanh khawh baklomi, ka hngalh khawh set lomi thil tampi cu cauk chungah a um. Hi cauk hi kum 1993 in kum 2000 tiang ka rak kau i ka rak reel lengmang. Kum 2000 hnu cun, hi cauk chung bia thiamthiam holh dang in an leh mi cauk ka reel.

Kum 2007, May thla ah ka cauk hlun pawl ka zoh tthan tikah ka Nu nih arak ka cawk piak hmasat bikmi cauk cu ka hmuh than. Duhsa tein ka vun kau than. Ahmasabik cahmai ah ka Nu nih ka min tang te ah Ks. 120, 4.7.1993 tiah a ka tial piak mite ka hmuh. “Ka Nu, ziah hi cauk hi hitluk lawmmam in aman arak fawi?” tiah ka Nu cu ka hal. Ka Nu nih, “ Hi cauk hi alak in an zemh mi asi nain, Bangalore in an rak phorh man Ks. 120 an kan hal mi a si” a ka ti.

Hi cauk hi ka Nu nih a ka cawkpiak hmasat bikmi cauk a si caah tuni tiang ttha tein kaa chiah peng. Cu hleiah, hi cauk chung bia hna nih ka nunnak lam ah thiltha tamtuk a ka cawn piak caah hi cauk chung bia hna hi ka tlaihchan peng. Ka Nu he lamhlat ah ka um hmanhah lungdai hnangam in a ka chiahtu, fim a ka chim pengtu, biatak a ka hmuhsak tu hi cauk chung bia tampi hna hi ka nunnak caah bia sunglawi bik an si hna.

Hi cauk hi kum zabu 20,asiloah,1993 ah ka rak reel lioah kum 1993 hrawnghrang nikhuacan he aa tlak in fim a ka chimtu asi i, tu kumzabu 21,asiloah, kum 2009 ah ka reel tthan tik zongah kum zabu 21 he aa tlak mi fimchimhtu a si thiamthiam caah ka uar, cun ka khuaruah zong ahar ngaingai.

Ka Nu nih a ka cawkpiak hmasat bikmi cauk cu Bible a si.